"كلنا هنروح"

- ابو شادوف يخرب بيتك ايه اللي جابك تاني؟

- ما نمتش طول الليل يا بيه

- ليه كف الله الشر؟

- سؤال محيرني ..وما نيمنيش.. وعاوزك تجاوبتي عليه

- اتفضل يا سيدي

- الاذاعة والتليفزيون عمالين يتكلموا على مجلس الشورى.. والمستشار فلان وعلان وأمين جامعة الدول العربية هو الاخر دخل في الدور

- وفيها ايه ؟ اسال وخلصني

- سؤالي يا بيه هي المشرحة ناقصة قُتلى

- اخرس يا متخلف تفهم إيه في الديمقراطية ؟عشان تتكلم الكلام الفارغ وتسال سؤال زي دا

- فهمني يا بيه انت المثأف الوحيد اللي اعرفه

- انت يا حمار مش تعرف ان في ماء بارد وماء ساخن ؟

- معلوم

- اه الديمقراطية كدا.. في ديمفراطية ساخنة وديمقراطية باردة

- وديمقراطيتنا من أي نوع سخنة ولا باردة

- شوف الغباء... طبعا باردة

- طب ليه يا بيه ماتكونش سخنة

- هو يا حمار لو الدنيا حواليك حر ومولعة يمين وشمال وشرق وغرب تشرب مية سحنة ولا مية باردة؟

- باردة طبعا

- شفت ازاي بقى بلدنا بلد منطقي والبزراميط مالوش أي مكان عندنا زي البلاد التانية ؟وانا الوحيد في مصر كلها اللي اكتشفت ان بيت الشعر دا" وكم ذا بمصر من المضحكات ولكنه ضحك كالبكاء" غلط في غلط وكذب في كذب وان المتنبي اللي قال دا كان عميل للاستعمار وأذيال الاستعمار

- يا بيه انا ما عرفش في الكلام الكبير دا ولا عمري سمعت على المُتَنيل اللي بتقول عليه دا

- المتنبي يا حمار مش المتنيل

- يا بيه من الاخر اروح الانتخابات ولا ما اروحش؟

- روح كلنا ها نروح